दक्षिण कोरियाको प्रविधि कम्पनी Samsung Electronics को शेयर मूल्यमा ऐतिहासिक वृद्धि भएको छ।

कृत्रिम बुद्धिमत्ता (AI) सम्बन्धी चिपहरूको माग तीव्र रूपमा बढेसँगै कम्पनीको बजार मूल्य (Market Capitalization) १ ट्रिलियन अमेरिकी डलर नाघेको हो। बुधबार मात्रै कम्पनीको शेयर १५ प्रतिशतभन्दा बढीले बढेको अन्तर्राष्ट्रिय सञ्चारमाध्यमहरूले जनाएका छन्।

यससँगै स्यामसङ, ताइवानको TSMC पछि १ ट्रिलियन डलर बजार मूल्य पार गर्ने दोस्रो एशियाली कम्पनी बनेको छ। FactSet का अनुसार स्यामसङले पहिलो पटक फेब्रुअरी २६ मा यो उपलब्धि हासिल गरेको थियो।

गत साता कम्पनीले सार्वजनिक गरेको पहिलो त्रैमासिक (Q1) आर्थिक प्रतिवेदनले पनि लगानीकर्तालाई उत्साहित बनाएको छ। स्यामसङको सञ्चालन नाफा (Operating Profit) आठ गुणाभन्दा बढी बढेर ५७.२ ट्रिलियन वोन पुगेको छ भने आम्दानी १३३.९ ट्रिलियन वोन पुगेको छ, जुन कम्पनीको इतिहासकै उच्च हो।

विशेष कुरा के भने, यो त्रैमासिक नाफा सन् २०२५ को सम्पूर्ण वर्षको नाफाभन्दा पनि बढी रहेको बताइएको छ।

यस उछालको अर्को कारण Apple ले आफ्ना डिभाइसका लागि अमेरिकामै चिप उत्पादन गर्न Samsung र Intel सँग प्रारम्भिक छलफल गरेको भन्ने Bloomberg को रिपोर्टलाई पनि मानिएको छ। यदि यो सम्झौता अघि बढेमा Apple ले लामो समयदेखिको साझेदार TSMC बाहेक अन्य विकल्प पनि प्रयोग गर्ने सम्भावना देखिएको छ।

स्यामसङसँगै दक्षिण कोरियाको अर्को चिप कम्पनी SK Hynix को शेयर पनि १० प्रतिशतभन्दा बढीले बढेको छ। यसले कोरियाको प्रमुख शेयर सूचकांक Kospi लाई इतिहासमै पहिलो पटक ७,००० अंक माथि पुर्‍याएको छ।

विशेषज्ञहरूका अनुसार AI प्रविधिको तीव्र विकासका कारण High-Bandwidth Memory (HBM) चिपको माग अत्यधिक बढेको छ। यही मागले स्यामसङको नाफा वृद्धि गर्न ठूलो भूमिका खेलेको छ। यद्यपि HBM बजारमा स्यामसङले आफ्नो प्रारम्भिक अग्रता गुमाएर अहिले SK Hynix पछाडि परेको छ।

यस अन्तरलाई घटाउन स्यामसङले HBM4 नामक नयाँ पुस्ताको मेमोरी चिपको उत्पादन सुरु गरिसकेको छ। कम्पनीले फेब्रुअरीमा विश्वमै पहिलो पटक HBM4 चिपको ठूलो मात्रामा उत्पादन सुरु गरेको र ग्राहकलाई आपूर्ति पनि थालेको जनाएको थियो।

HBM4 प्रविधि विशेषगरी Nvidia को आगामी Vera Rubin AI Architecture मा प्रयोग हुने अपेक्षा गरिएको छ, जसले डाटा सेन्टरमा अत्याधुनिक AI कार्यहरू सञ्चालन गर्नेछ।

विश्लेषकहरूका अनुसार AI सम्बन्धी मेमोरी चिपको अभाव, सीमित आपूर्ति तथा स्यामसङको प्रविधिगत सुधारका कारण कम्पनीको शेयर अझै केही समय बलियो रहने सम्भावना छ।

Morningstar का प्रविधि विश्लेषक Yu Jing Jie का अनुसार AI प्रविधिलाई उच्च गति र विशाल स्टोरेज क्षमता आवश्यक पर्ने भएकाले DRAM र NAND मेमोरी चिपको माग अत्यधिक बढेको छ। नयाँ सेमिकन्डक्टर कारखाना सञ्चालनमा आउन २ देखि ३ वर्ष लाग्ने भएकाले अहिलेको आपूर्ति संकट चाँडै समाधान नहुने अनुमान गरिएको छ।

हाल विश्व HBM बजारमा SK Hynix को हिस्सा करिब ५५ प्रतिशत रहेको छ भने स्यामसङको हिस्सा करिब २५ प्रतिशत रहेको बताइएको छ। तर पछिल्लो समय सामान्य DRAM चिपबाट हुने नाफा HBM भन्दा बढी हुन थालेकाले लगानीकर्ताहरू स्यामसङप्रति अझै सकारात्मक देखिएका छन्।

WINNER UPDATE

2026/5/11